يُسمع صوت من خلف الكواليس.

صوت أنثوي حاد: حنفي…حنفي! إنت يا حنفي زفت!

صوت رجالي: أنا هه يا مزموزيل..تؤمري بأيتها حاجة يا هانم؟

الصوت الأنثوي (بغضب شديد): مية مرة قايلالك يا حيوان تشغل الإي سي أبل ماجي الاستديو!

الصوت الرجالي (بخضوع): متأسفين يا هانم..حقك عليّ المرا دي…

الصوت الأنثوي: مش عايزة أسمع ولا كلمة! غور من وشي الساعادي قبل ما ولع فيك جاز!…يا حسين …يا حسين إنت فين؟!!

حسين (بصوت مطمئن و منافق): الله الله الله..الجميل زعلان ليه النهارده؟

الصوت الأنثوي: إيه الأشكال البيئة إللي انت مشغلها دي؟ دي مؤامرة..انتو عايزين تبوظو لي مكياجي؟ لأ أدي أكيد مؤامرة من منى الشازلي …أصلها غيرانة مني و من نجاحي!

حسين: بصي يا أمر…سيبك م الكلام ده كله و يللا كوووول داون ع الآخر..النرفزة مش حلوة عشان بشرتك…كلها دقايق و هنصور…(للعاملين في الاستوديو)…يا سليم…يا شيحة…كاميرا ون..كاميرا تو..إفري بادي ريدي؟ سري ..تو..ون!

تخرج المذيعة نادية من خلف الكواليس و تدخل دخولا استعراضيا تتعمد فيه أن ترسم ابتسامة دلال و رقة على وجهها…

المذيعة: أعزائي المشاهدين أهلا بيكو في حلقة جديدة من برنامج سكَف نفسك تبأى قشطة…البرنامج السكافي الوحيييييد إللي تتصل فيه و أنا أرد عليك بدون كنترووووول!

أعزائنا المشاهدين سؤال حلئتنا النهرده سؤال يحتاج تفكير جامد أوي أوي بس نحن واسكين في زكاءكم و السؤاااااااال أعزاءنا المشاهدين بيئووووول:

أم مريم عندها أربع بنات: خوخة و تفاحة و مشمشة…إيه اسم البنت الرابعة؟

أعزائنا المشاهدين اتصلو اتصلو فورا على الرأم 0800777علشان تكسبوا الجايزة إللي قيمتها 100 ألف دولار….اتصلو و ما تفوتوش الفرصة…..و بليز تفكروا كويس أبل ما تجاوبو….

أعزائنا المشاهدين يظهر إنه فيه اتصال…..ألو….ألو….معاك برنامج سكف نفسك تبأى قشطة….ألو….

أحمد:

ألو….ألو….ألوووووووووو… معاك أحمد ….

نادية:

اهلا بيك يا حماده…عامل إيه…إنت منين يا أحمد؟

أحمد:

ألو…ألو…أنا أحمد….يا زينك زيناه….

نادية:

إنت من زيناه يا احمد؟ يا هلا بأهل زيناه كلهم….

زيناه دي فين يا حماده؟ في جنوب و لا شرء السعودية؟

أحمد:

ألو … نادية…كيف حالك يا قمر…ترى و الله و الله و الله من يوم ما شوفك الدنيا تشرق و الشمس تنور و القمر يغرد.

نادية:

مرسي على كلامك اللطيف يا أحمد….و يا ترى فكرت معانا في سؤال الحلأة؟

أحمد:

أقول… هو برنامجكم وش اسمه؟

نادية:

يظهر ان الاتصال اتأطع…اعزائنا المشاهدين مرة تانية سؤال الحلأة:

أم مريم عندها أربع بنات: خوخة و تفاحة و مشمشة…إيه اسم البنت الرابعة؟

اتصال جديد من متصل جديد…ألو….ألو….و معانا سعيدان من السعودية…أهلا يا سعيدان….

سعيدان:

ألو….ألو….لو لو سمحتي…..ممكن أشارك؟

نادية:

ألو….أيوة طبعا يا سعيدان….السؤال بيئول:

أم مريم عندها أربع بنات: خوخة و تفاحة و مشمشة…إيه اسم البنت الرابعة؟

سعيدان:

أقول….صراحة برنامجكم جدا راااااااااائع….و أنا بصفتي مواطن سعودي أشكر كل القائمين على هذه القناة الراقية التثقيفية و أشكر كل جهودكم المبذولة….صراحة تتعبون و انتو واقفين كذه طول اليوم تترقصون….

نادية:

طيب فكرت في السؤال…سؤال حلئة النهارده يساوي مية ألف دوالااااااار….فكر و ركز كويس عشان تكسب معانا يا سعيدان….

سعيدان:

ممكن السؤال مرة ثانية عشان ما كنت مركز؟

نادية:

سؤال اليوم هو: أم مريم عندها أربع بنات: خوخة و تفاحة و مشمشة…إيه اسم البنت الرابعة؟

(و هي تغني بدلال سمج و متصنع): يللا يا سعيدان…اسم البنت الرابعة إيييييييه؟ يلا يا سعيدان!

سعيدان:

اسمهاااااااا….عنبة؟ لا لا خيارة؟؟

تظهر نادية و هي تمثل و كانها تبكي لأن الإجابة خطأ….

نادية:

أو نوووووو…متأسفين أوي يا سعيدان و هاردي لك…..إجابة خاطئة….أعزائنا المشاهدين ركزوا معانا و فكروا كويس عشان تكسبوا معانا…100 ألف دولار….عايزين رابح النهارده…عايزين رابح…

عايزين رابح….عايزين رابح…عايزين رابح….

و تستمر في الرقص و الغناء…

نادية (بحركات استعراضية سمجة و مفتعلة):

فكر و ركز…تبأى قشطة…اتصل …تكسب…مجرد تلات خطوات…فكر…اتصل…جاوب…و تبأى كسباااااان!

و معانا اتصال من السعودية…ألو…ألو….ألوووووو…

سراج:

ألووووو…سلام عليكم…

نادية:

و عليكم السلام …تعرفني بنفسك لو سمحت…

سراج:

معاكم سراج دشدشني من بلاد الحرمين الشريفين….و بهزه المناسبة أحب أن أشكر مليكي و سيدي خادم الحرمين الشريفين على كل جهوده المبزولة في سبيل التطوير و تحسين بلدنا….و كمانا احب أقول…

تقاطعه نادية:

أهلا بيك يا سراج…و يا ريت تقول لنا على حل الفزورة…

سراج:

طيب من عيوني يا عيوني….بس قبل ما أجاوب…عندي اقتراح للبرنامج عشان يسير برنامج زي الناس…

نادية (و هي منزعجة):

اتفضل حضرتك و قول اكتراحاتك (ثم تستدرك الموقف)..و اكيد كل اكتراحات مشاهدينا الأعزاء محل اهتمامنا…

سراج:

يا ريت يعني تسهلو الأسئلة شوية عشان يفهموها العامة….و يا ريت كمان تحطو اسئلة دينية و تاريخية … يعني مين هما الخلفاء الأربعة…و لمازا سمي عام الفيل بهزا الإسم…

نادية:

أكيد يا سراج….كل الأسئلة المهمة دي راح نحطها في عيونا….بس يا ترى عرفت الجواب يا سراج…أم مريم عندها أربع بنات: خوخة و تفاحة و مشمشة…إيه اسم البنت الرابعة؟

سراج:

و الله الحقيقة و الواقع إنو لو الست أم البنات هادي كان عندها بنت زيك كده فرفوشة و مدردحة كان كفاية عليها و كان ما جابت لا البنت التانية و لا الرابعة…..بس يعني …المهم…الجواب المنطقي للسؤال هو إنو اسم البنت الرابعة فواكه…

نادية:

أو نووووووووو!!!!

متأسفين أوي يا سراج….أعزائنا المشاهدين….اتصال واحد بس و يكون واحد كسبان معانا 100 ألف دولاااااااااااار….اتصلو اتصلو….عشان تكسبوا…100 ألف دولار….أرجوكم اتنيلو و اتهببو و اتصلوا….مش محتاجة… غير تلات خطوات….

فكر…ركز…و اتصل…و إنت الكسبااااااان!!! و نحن مش كسبانين حاجة على فكرة دي كلها أعمال خيرية لصالح الجميعات الثقافية…

اتصلو ..اتصلوا قبل ما استقيل …و لو استقلت هشتغل رقاصة و ذنبي ف رقبتكم و حتبقوا انتو الخسرانين!

***********

تمت تأدية هذا المشهد على مسرح كلية دار الحكمة 🙂